Витр боблари

Абу Саъид Ал-Худрий (розияллоҳу анҳу)дан ривоят қилинди; айтди: «Набий саллаллоҳу алайҳи ва саллам зуҳо намозини (баъзи кунлар) шундай (узлуксиз) ўкир эдиларки, биз ҳатто, энди бу намозни ҳаргиз тарк қилмайдилар, дердик. Баъзан эса шундай ташлаб қўяр эдиларки, биз ҳатто, энди бу намозни ҳаргиз ўқимайдилар, дердик».

Абу Ҳурайра (розияллоҳу анҳу)дан ривоят қилинди; айтди: «Расулуллоҳ саллаллоҳу алайҳи ва саллам бундай дедилар: «Кимки тўрт ракъат зуҳо намозини мунтазам ўқиса, гуноҳи денгиз кўпикларича бўлса ҳам, кечирилгайдир».

Абуд-Дардо ва Абу Зарр (розияллоҳу анҳумо)дан ривоят қилинди; «Расулуллоҳ саллаллоҳу алайҳи ва салламнинг хабар беришларича Аллоҳ таборак ва таъло бундай деб марҳамат қилади: «Эй Одам фарзанди! Сен кундузнинг аввалида мен учун тўрт ракъат намоз ўқигин, Мен кундузнинг охирида сени ҳузурга эриштираман!».

Абдурраҳмон ибн Абу Лайлодан ривоят қилинди; айтди: «Расулуллоҳ саллаллоҳу алайҳи ва саллам зуҳо намозини ўқиганларини менга Умму Ҳониъдан бошқа ҳеч ким хабар қилгани йўқ. У, Макка фатҳ этилган куни Расулуллоҳ саллаллоҳу алайҳи ва саллам уйларига кирганларини, ғусл қилиб, саккиз ракъат намоз ўқиганларини сўзлаб берди. Ва айтдики, «У зотнинг шу саккиз ракъатдан ҳам кўра енгилроқ намоз ўқиганларини асло кўрмадим. Аммо рукуълари ва саждаларини мукаммал қилар эдилар».

Анас ибн Молик (розияллоҳу анҳу)дан ривоят қилинди; айтди: «Расулуллоҳ саллаллоҳу алайҳи ва саллам бундай дедилар: «Кимки ўн икки ракъат зуҳо намози ўқиса, Аллоҳ унга жаннатда олтиндан бир қаср бино килгайдир».

Саъид ибн Ясордан ривоят қилинди; айтди: «Бир сафарда Ибн Умар билан бирга эдим. У кишидан оркада қолдим. Шунда: «Қаерда эдинг?» деди. «Витр намозини ўқидим» дедим. Айтдики, «Ахир, Расулуллоҳга чиройли эргашмоқ сенга ҳам тегишли эмасми? Мен, Расулуллоҳ саллаллоҳу алайҳи ва саллам туяларининг устида витр ўқиганларини кўрганман».

Умму Салама (розияллоҳу анҳо)дан ривоят қилинди; «Набий саллаллоҳу алайҳи ва саллам витрдан кейин икки ракъат намоз ўқир эдилар».

Толиқ ибн Али (розияллоҳу анҳу)дан ривояат қилинди; айтди: «Расулуллоҳ саллаллоҳу алайҳи ва салламдан бундай деганларини эшитдим: «Бир кечада икки витр йўқ!».

Ибн Умардан (розияллоҳу анҳумо) ривоят қилинди; Расулуллоҳ саллаллоҳу алайҳи ва саллам айтдилар: «Тонг отиши билан барча кечки намозлар ҳамда витр намози кетгайдир. Бас, тонг отмасидан олдин витрни ўкингизлар!».

Абу Саъид Ал-Худрий (розияллоҳу анҳу)дан ривоят қилинди; айтди: Расулуллоҳ саллаллоҳу алайҳи ва саллам бундай дедилар: «Субҳга етмасдан олдин витр намозини ўқингизлар!».